.webp)
Coronavirus. Catanzaro "chiacchiera" con un suo cittadino: "Mamma mia trafficu cchì (non) c'è.."
23 marzo 2020 19:05
di Davide Pirrone
Una lettera, un colloquio tra un cittadino e la sua città che vede cambiata, un’atmosfera surreale che trova poche risposte a tante domande. Ma cara Catanzaro, questa pausa ha scandito il tempo con pause più lunghe quasi a voler realizzare a quante cose nel tempo abbiamo rinunciato, evitato. Ma una cosa è certa: qualcosa accadrà soprattutto dentro i nostri cuori
Mamma mia trafficu cchì (non) c’è
.webp)
Eh, cara Catanzaru, vidisti comu ni conzamma? Ma on sacciu si u sapisti (ma pensu u capiscisti..), ava na decìna e jorni cchì ni misamu in quarantena.
Ah notasti ca c’è menu gente ?
E si pecchì c'è stu Covid ( ormai n'imparamma puru u nomu scientificu) ca è nu virus ca sta ogni jornu contagiandu tutti, e ppemma evitamu u contagiu nì raccumandaru ma stacìmu chiusi dintra e ma nescimu sulu ppè medicini e giustu a spisicedha.
Cchì dici? Quand’è cchì venimu e ti trovamu?
Prestu on t'appricara, i picciulìdhi on vidanu l'ura ma nescìanu fora, e forsa forsa capiscettaru ca sti smartfon on fannu tantu bonu, e ccà u pallona e l'amichetti su a vera mancanza.
Ci su persuni ccà ma fannu a spisa vannu ala putica sutta a casa o subba u Corzu e rimaniru meravigliati e quantu si beddha, s'avianu scordatu e quanti vichiceddhi avivi e quanti vetrini e negozi ti rendìanu luminosa.
I vidi tornara ala casa ccù u magona, comu si si sentanu in tortu ca ti dassaru tuttu stu tempu e ccà si ricordanu e tia mo cchi ccè bisognu.
Ah notasrti tuttu chissu?
E si pecchì nu pocu i giustificu: u lavoru, a vita frenetica, spessu rimanda tuttu chidu cchì e beddhu avimu e non nu godìmu abbastanza, pecchì avimu u vizicedhu:" si po vaiu, e si c'è tempu.."
Eh ..ma on misamu in preventivu ca e nu jornu a n'atru si bloccava u mundu..
Si n’cunu si pijja cura e tia?
Ma certu Catanzaru mia, avimu a ditta ccù l'operatori ecologici ca ogni jornu ti coccolano e ti rendanu beddha pulita e nova nova, i forzi dell'ordine cchì giranu matina e notta ma s'assicuranu ca tutti su alu sicuru e ca nessunu ti fa mala, i sanitari n'te spitali ca su stremati,stanchi, ma non s'arrendanu anzi, su ddha ccù turni impossibili ma curanu e dara assistenza a tutti quanti, hannu nu cora randa ca c'è spaziu ppe tutti ..
E puru na cosa aiu ma ta dicu..
N'ta stu momentu difficile capiscettamu ca i cosi cchiù semplici su a vera fortuna..
A passiata versu u pana, voleramu ca chidu marciapieda on fina mai..
A bolletta ala posta senza ma ni damu a manu o ma n'abbrazzamu pecchì n'cunu cchì canuscimu u trovamu sempa, ni manca tuttu chissu . Mentra aspettamu fora in silenzio giramu u sguardu versu u bar chidu e l'amicu ca dopu a posta era a h'fermata d'obbligu ma ni passamu a menzuredha e cca invecia mo rimanìu na serranda vasciata pronta ma s'aza cu sapa quandu..
Vò ma ti facìumu naa promessa?
Promessi non u sacciu, ma na cosa su sicuru: quandu tuttu fina n'cuna cosa cambia soprattuttu intru e nui..
Stu tempu fa riflettira, e spessu porta consigliu e magari chissà, cchiù persuni su pronti a coccolara a propria città, u propriu quartiere..
On viu l'ura ma fina tuttu chissu..
On viu l'ura ma nesciu ppè strata e dira:
"Mamma mia trafficu cchì c'è"
..u giru e cchiù subba u Corzu u fazzu volentieri..pecchì tuttu chissu mi manca.
A presto Catanzaru
