.webp)
Franco Cimino: "E ni scordamma puru e tia, Otello Profazio!"
23 luglio 2024 20:23
di FRANCO CIMINO
Ote' e chi caspita, moristi e mancu nu dicusti! Addirittura, l’annu scorzu. E sti tempi. D’estata. Propriu comu ohia, vintitrí lugliu. Ci furu i funerali a la chiesa e Riggiu, ma on c’era nudru e penzamma c’on c’eri mancu tu! Mo’ chi passau n’annu e non ci fu mancu u lutto e l’anniversariu, tu on moristi ancora! Ca nui calabrisi simu bona genti( comu a chiami tu) , de perzuni toghi on ni scordamu. Si ci volumu bena, puru a ciangimu
E si ni ficia bena, a pregamu com’u santu all’artaru.
No, on moristi,
 (002).webp)
sinnó u sai quanti missi sti chiesi chiesi!
E quanti comizzi sti chiazzi chiazzi.
Previti e patruni,
sindaci e padrini,
masculi e fimmini
a mugghiara, tutti a parrara e tia.
Quantu fusti bellu e bonu, intelligenta e allitteratu, eleganta cu a parrata fina!
Calabrisa d’o Strittu allargatu finu a la Sila piccola e randa.
De sta Calabria,
comu dici tu,
terra ducia e amara.
Duva l’arberi, chi si moticanu a lu ventu, sonanu
E l’ondi d’o mara cantanu. Cantanu supra i lacrimi de mammi, i risati de picciulidri, u lamentu
de cu fatica a la iornata,
E supra u gridu disperatu e sta terra chi non lotta e non s’arrenda.
A nui n’abbasta
l’aria pe’canpare, ca rivoluzziona po’ aspettara, si puru idra s’incriscia ma vena.
On moristi Ote’.
E si ni scordamma e tia, fannillu sapira tu. Mandani na poesia, cantani na canzuna.
*(nell’anniversario dimenticato della morte di un grande calabrese)
