Per tutti quei ragazzi che decidono di andar via da qui...

di FRANCO CIMINO

Per tutti quei ragazzi che decidono di andar via da qui.
E per tutti noi che li abbiamo lasciati andare,
non avendoli mai visti arrivare, per paura del loro dolore.

On su pacciu no,
e non mi drogu.

Tu mi facisti diversu
ca on’assumigghiava a tia.
chi ti ficiaru uguala a tutti l’atri

Ma cumpariti belli comu
u previta a l’atara
e i picciulidri a la prima comuniona
vestiti d’angelu e de sposa.

On su pacciu no e nemmeno lordu
tu mi vidivi accussì pemma ti scanzi e mia
ca ti pariva bruttu si ti vidivanu cu sta compagnia.

On su pacciu e non mi drogu
ca a scatuluni u veluni mu pigghiavi
girandu sulu pe’ stradi e viculi
e stu paisa chi on vozza a mia

E nemmenu a tia chi ti sentivi patruna
chiù do santu chi portavi in processiuna.
Sulu na cosa è vera de’ milli fisserii
chi cuntastuvu davanti u barru de’scienziati
e ‘nte scoli d’uva tutti siti professori:
mi ‘mbriacavi. Sì, mi ‘mbriacavi.

Tutti i siri quandu on mi vidivi passara
Mi ‘mbriacavi e vinu ‘nbalusu
e musica stonata e de canzuni sciunduti

Mi ‘mbriacavi e ricordi boni e di sogni
chi ogni notta fazzu, quando mi trovu
principa bellu in mezzu a tanti principi
e pricipessi, vestiti d’azzurru e virda,
comu l’occhi cangianti da regina mia.

U paisa è na reggia randa fatta e mattoni d’oru

C’è terra e granu, lavoru bonu e casi belli pe’tutti

Nessuno cumanda e l’ordine è a ogni parta.

Non c’è bisogno da giustizia pecchi l’ingiustizia
e a furfanteria, u brogghiu e a bugia, on ci sunnu propriu.

Simu tutti uguali, pecchì simu tutti diversi

Tutti belli ca nessunu è uguala a l’atru.

Diu ni ficia accussì e non u capiscimma

Eu mo’ mi ‘ndavaiu ch’é tardu.

Mind’ahiu e hjra ca su stancu
cu i gambi e i pedi pisanti
quantu na campana ch’ on sona,

Ma non sugna sfiduciatu e neppura rassegnatu.
Non farti quindi na curpa pe’sta partenza mia
non sì tu chi minda facisti jira.

Fatti cuntentu e cangia sulu capu
e stu modu trista e penzara cu a capu e n’atru
U cora l’hai bonu, fallu funzionara.

Eu ci criu a tia e tutti vui inzema
chi pure on cridistivu a mia
quando cercava ma vi parru e on mi sentiavu propriu.

Vi vogghiu bene oja e mala on vi vozzi mai
e pe’regalu e Natala chi passau
vi lassu arretu a porta l’unica mia poesia

“Eu pensavi sempre ca sta palla chi gira
a lu stessu modu è propria bella.
Ava na magia chi incanta,
comu na giostra de bambini chi sagghianu supra
u cavazzuzzu e si mintanu a cavalcara.

Volitici bena puru vui a chissa palla
e difenditila da chidri chi penzanu ca è a loro
pemma ‘nda fannu chidru chi vonnu,
comu cu a vita de’ cristiani.

Sta palla è de tutti e subba c’è ancora
postu pe’ ogni omu chi ci vola jocara,
comu nu picciridru cu a sabbia bagnata do mara. “

E mo‘ chi stu tempu meu mi scatta comu na freccia,
continuala tu sta poesia.
Mintici i paroli toi.
Fallu pe’ mia.

CLICCA QUI